“فراق ماسخ” للشاعر علي ابو المجد

“فراق ماسخ” للشاعر علي ابو المجد
مشاركة الموضوع :

يا سيدي عب رحمن
يا مقدم الورد الندي للحور
أمانه يا سيدي ..
لو كان عليا الدور
ل تحنن الكفين شوية
يا سيدي عب رحمن
يا سيد القطر / الزمان
ب اوصيك وصية
سايق عليك المصطفى / و الريح ..
مشتاق صحيح / لكن ورايا لحم
خايف عليهم من فراق ماسخ
البعد – ممكن – يبقى سهل ..
لو كان خفيف
لكن بيدبح ..
لو كنت..
– آخر وردة وقعت ف الخريف –
شوف يا شريف الأصل يا ندر البيوت
بان المدى / و الضيق ..
هابيل و قابيل
و البنت / بترش الندى ع القبر
يا هل ترى
الشمس خفت ؟
ولا المطر ..
لساه متقل جسمها
بانت رموش الخلق م الرهبة
خفر سواحل
أوتاد من الحزن العفي ..
واصله الحياة بالموت
ودعت آدم / ﻷ ما ودعتوش
مديت غيابي للحبايب صبر ..
و دموعي ونس
ف آغسل قلوبهم ب اللبن
يا سيدي يا طيب / و سيبني
ب آترجى من بعد الأمل / إبني
شوكة حنين ..
كانت كفيلة لو تصيبني
تنهش جبال نسيان / رواسخ
يا سيدي عب رحمن
مشتاق صحيح / لكن ورايا لحم
خايف عليهم م الفراق/ الماسخ

مشاركة الموضوع :
الشاعره هدى غريب

الشاعره هدى غريب

هدى غريب شاعرة تعمل في مجال الصحافة مدير مركز التنوير لتنمية المهارات

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

ستة − اثنان =