التنوير – eltanwer ثقافه وفنون
- #رؤية_واضحة
من قبل ما الموج ..
كان ينادي ع النهار : يرتاح
و يبلع الشمس ب حنان قطة /
مال قلبي / زي : فلوكة
و روحي فضلت ع الرصيف تنده ..
تعالوا
ما تصدقوش : إن اللي عايش مات
و ان اللي مات :
عايش ف جنة خلد
الوقت مش وقت النوارس
ولا زمان : الحق
مهما الطيور ..
تشبع على : ضهر المراكب
برضه هتشتاق ل السما ؛و البحر
كات روحي ..
واقفة ع الرصيف
لكن /
كان الحمام ..
يومها ارتضى ب النحر
كل الشياطين : لحن واحد ..
مش شجي / لكن طروب
كل الملايكة ف الرضا : آلات
شرطت أفيون ..
ﻷ .. ماصصني المر
حتى السنابل طرحت : خشخاش ؟!!
ضهري ما جاش
و صباعي مكسور ف المدى ضله
كل الصحاب عني : بيتخلوا
و انا اللي سايق ف : الوفا
وحدي ف كهف الليل
تؤنسني أعدائي
أو أنسى ذكرى ل الحبيب الأول
نفس المساحة م الألم
نفس الشعور ب الخزي
ما يبكينيش ..
غير طعنة اليود ف عضام ..
المركب المومس
أو غزل بيقاوح فساد العالم التالت
شروة سمك
متباعة ب الحوجة ..
ل خوجة : من بني عدنان
جبل عتاقة ..
كان رفيق مشوار ؛و بس
في دم لسه ب يغلي ع الأتكة
قلبت عيني كتير ..
و قلبت الندى ع الورد
المشهد اللي انتصر في آخر الرحلة
كان الحقيقة ؛و سلمة لله
عيطت يمكن توضح الرؤية
جاني الحمام شايلة إيديه : سمكة
#علي_أبوالمجد