المشنقة

بقلم الشاعر/ محمود هليل 

.…..المشنقة………

فكى حبال المشنقة
عن جيدك المغلول عمد
والا انتى لسه مصدقة
الحبل زينة من ياقوت
والمشنقة كردان دهب
لسانى جواكى أسير
بشرب مرار الكيل عسل
لسه مابين روحى الشهيدة بصبرها
وبين شواشى جنتك
سطرين أمل
الحلم لسه ما اكتمل
ف اغتصبه طغيانا
وقهرا وافترى
شبح الكابوس
اللى تجبر وافترى
يا هل ترى..ايه اللى جرى
بنمد خطوة للأمام
اتارينا خدنا ……!!!
خدنا ميت خطوة ل ورى

فكى حبال المشنقة
متشرنقة ف حضن الزمن
مصلوب على جدران
حضارتك والتاريخ
حلمى الشريد
وليد..نموه ما ابتداش
لكنه عاش
يحلم بيوم ما تهدهى
وتجددى العهد القديم
ضمية على صدرك قوى
وعلميه
ازاى يناجى ربنا
وازاى يصلى
ركعتين وقت الضحى
والليل اذا جن وسجى
تصحى بقيام الليل حياة
وتصلى ب الروح ركعتين
بس اوعى تنسى ..توترى
وتعلميه..وتسمعيه صوت الأذان
طهر الجوامع والكنايس والعلم
وعلميه ازاى يعيش ماسك قلم
ازاى يداوى الجرح ويعادى الألم

فكى حبال المشنقة
الشمس لسه مشرقة
تروى غيطان يأسك بقا
متشوقة
تحصد ضياها بضحكتك
تهمس ف موج بحرك يعود
بعد الرحيل تحضن شطوط
تستنى بعد غياب لقى

فكى حبال المشنقة
واتحررى
والله ممكن تقدرى
تسقينا من روحك حياة
ارواح وموصولة بروحك ع المدى
قومى انحرى غل العدا
لو تنتهى راح انتهى
وكأن عمرى ما ابتدى

فكى حبال المشنقة
واكون سلاحك والدروع
لو ثورتى يوم ضد اللى خان
واللى استباح عرضك وهان
واللى ب دمانا وحلمنا يوم استهان
لو ثورتى يوم
ان شفت حسرة قلب ام
ابنها مات ع الحدود
او فى الميدان
او تسمعى
ساعة سكون الليل بكى
طفل اشتكى
علشان ابوه ميت جعاااااان

شاهد أيضاً

هذا أنا

بقلم الشاعر/ عادل زلوم هـــذا أنـــــــا )) انـا الــذي هـجـر الـنـعـاس وسـادتــي وتـعـانـقـت شـمـس النهار …

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

تسعة عشر − 17 =