قطر العمر

بقلم الشاعر / محمد السيد

يا قطر العمر ليه سابق خيول الحظ
على مهلك
عشان خاطرى
وهدى شوية يا قطرى
بلاش اسمع نفير الشعر لمّا إبيض
ما تحبسنيش فى قضبانك
ده لسه شقاوة العشرين
بتتشعبط يا دوب فى الارض
ولسه سنانى لبنيه
ولسه بكح من دخان سيجارة والدى بعد الفرض
وحلمى بشوقه بيرفرف
كأنه طير فى بنية
يا قطر العمرمن فضلك ……
بحنية
بلاش تجرى
انا قادر اقوم واجرى
فمتكتفش خطوة رجلى بالعكاز
بلاش دايما تكون دوغرى….
وكون منحاز
وسمعنى صدى صوتى وانا .. عيل
يا قطر العمر ما تمـيّـل
وترجع بيا للحارة
ومسكنى فى ايدى كتاب
وايدى التانية زمارة
واقولك تووووووووووووت
اقولك فوت وكبرنى
ولا انت كنت راضى تفوت
ومفضلتش مصغرنى
ووقت الفرح كنت بتجرى كالرهوان
وفى الاوجاع… مبتمشيش
وانا انسان وطبعى انى اكون طماع
ما تسمعليش
ولا تسرع ولا تهدى
يا قطر العمر لا بيدك ولا بيدى
ما تسمعليش
كفاية عليا انى اعيش

شاهد أيضاً

Как Делать Ставки На Спорт Руководство Для Начинающи

Как Делать Ставки На Спорт Руководство Для Начинающих Что Такое Система В Ставках На Спорт? …

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

ستة − ستة =