“أحمر…لونك فراولة”للشاعر محمد محمد خميس.التنوير_eltanwer

” أحمر .. لونك فراوله “

اللون بيحن
ويفرفط حب الثمر
على خطوه بتمشيها
بتبل الريق
وتدب على سمسم مبدور
تخضر الزرعه اللى ف حجرك
يحمر الخد
تتبدا فراوله
بيسيل ريقها على جلد الوش
البق فراوله
الخد فراوله
الدم فراوله
يبدأ مع دمى
ومصبه عروقى
دوقى
طعم فراوله بيطلع منك
حتحسى النار اللى ف ضلعى
(غزاله قالت للنبى خدنى
غز الغزاله شرطه فى عنيكى
وأنكب دم
غر الخطاوى دبة الرجلين على صفحة خضارك
بل ريقها
نشوة الواقفين على جنب الطريق
هاتف دعى
لبيت نداه )
اللون بيحن
وبيفضح همس الروح للروح
النار
أولها اللسعه
وآخرها براءه
الأحمر فضاح وبيصرخ
الأحمر
لون مناخير البنات الصبح
والخنجر الراشق ف صدر الكون
وطراوة حب الفراوله بين الشفتين فى الصيف
( اللمعه ف خدودك بتبك دم
أنا روحى فيكى مش حبيبه
أنا روحى فيكى
تكونى أم
يا لون بيزحف من تحت جلدى
يا لون حبيبتى
منك حريق
منك يكون الطهر .)