الغياب..شعر علي ابو المجد

أظن ؛ جاه الوقت .. اللي الغياب فيه ؛ يغيب
يرجع قميصي ؛ لوحده .. دون أخو ؛ أو ديب
يرجع قميصك ؛ واشمه ..
-تاني- ؛ يا اغلى حبيب
أظن ؛ جاه الوقت .. اللي الغياب فيه ؛ يتوب
يترد نور البصيرة ..
والليالي .. تطيب
وافضل غريب -يا حبيبي- ف الزمان الغريب
أنا ؛ اللي قلبي ..
ندي ؛
من كلمة ؛ يتأثر
كان ليا صوت .. وعيون .. وبلاد ؛ بتستنى ..
مني النهار الجي
كان .. قلبي حي
ماعرفش ايه سمني .. حولني قالب طوب
فوقي جدع معطوب ..
لا داب ؛ ولا اتمنى
نفض همومه ؛ عليا .. وسابني ؛ متعفر

من كام سنة ؛ يا أنا ..
لسه بايعني ؛ الخوف
من كام سنة لا بشوف ؛ أو كنت قادر اشوف
ب الكف ؛ أو ب الريق
؛ أو ب الودان الحاضرة
شميت دموع المخاليق .. فوق خدود الطريق
فات من هنا قبلي
عيل .. ف إيده السنابل ؛ والأماني الخضرة
هيفوت هنا بعدي
عيل .. ف روحه التجارب ؛ والليالي اليابسه
يا قلبي توه ف السكك ؛؛
و اكسر ضلوعي ؛وهج
اللي اتخلق له ؛ جناح .. بيموت من الحبسة
شوفني وشوف ازاي .. إن المدى مخنوق
وانظر ب عينك ؛ وقول .. كام نسخة تتطابق
أنا الملاك ؛ الجبان ..
اللي اشتغل ؛ حاوي
قدروا عليا العيال .. جم نتفوا ؛ ريشي
مقتول ؛ ودمي اختلط .. ب حمرة البرقوق
على حدود الخدود .. ضاع وانسحب جيشي
با اجري ب رجلي ..
اللي كانت بطن ؛ ف السابق
وانسى ؛ حنان الحليب .. ما يذكره ؛ فمي
شوفني ؛ وانا با اتني .. ف سنين بتتسابق
با اشب ؛
واطول ؛ واعود .. مشتاق ل صدر ؛ امي
خبيت حبايبي ف كمي ؛ كارت مش محروق
للدنيا ؛ لو ضاق خيالي .. أو وسع ؛ طيشي
يا قسوة اللمسة ؛
اللي بتيجي بشوق
يا قسوة اللمسة .. اللي ؛ ما بتجيشي
علي أبوالمجد