ألوان عصرية كامل عيد رمضان

بَعْرف تفسير الأحلام
بَعْرف لون الأيام – من إيه ..!
وبنشرب ليه كاسك يا زمان ؟
بَعْرف مع إنى ما نيش “لقمان”
أبو رأى سديد
مع إنى لسه فى إيدى القيد
بَعْرف أعاجيب وبيوت سراديب
بتلم الفاضى مع المليان ..
.. ……….
بَعْرف فى الفرح وف الأحزان
وبنعشق ليه اللون الغامق م الألوان ؟!
…….
بَعْرف إنسان ..
لو نام وف عقله الباطن وهم –
مسكين ..مقلوب معدول
يتفزع ف الرقدة
وبتحاصره خطوات الدادابان .
………
بَعْرف تعابير السكة ف أى مكان ..
الناس الزيف ..
والزيف الناس ..
الندهة ف عب الليل .
.الخوف الموت ..صوت السجان
…….
بَعْرف فى مزاد الخير
والناس أمات طراطير – بيبيعوا البسمة بكام …!!
أحزان.. أحزان.. أحزان ..
أو بعض أيام ..
لحظات بتشيلنا لفوق ..
وسنين تحت الأقدام