بحبك

بحبك
مشاركة الموضوع :

بقلم الشاعر / عمرو اللمعي 

بحب البراءه في وش العيال 

وخان الخليلي والأقصر وريش 

وحس الأغاني في بيت السحيمي 

وصوت الرفاقه في قهوة حشيش 

بتاع الكمانجه في ساقية غنيم 

وطول المآذن في مصر القديمه 

بتاع الفريسكا في شاطئ جليم 

وعبده البياتي وسوما العظيمه 

مرور المراكب في حضن القنال 

ومصر الجديده وشارع شهاب 

وحضرة نبينا في سيدنا الحسين 

ورقصه عيوني في حضن الكتاب 

مدرج تجاره ومستر عصام

بتاع الرياضه في تالته إبتدائي

وأحب العروبه وصاحبي العراقي

وريف البداري وأرضه الشراقي 

بخاف إني أعبر ويطلع شعوري 

وأخاف إني أقولك  بحبك تثوري 

تقوم الحكومه تقصقص في ريشي

بحبك وراضي إني أموت ألف مره

بشرط إن حضرة جنابك تعيشي 

 

مشاركة الموضوع :

شاعر الموقع

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *