حبيبي الغايب الحاضر

حبيبي الغايب الحاضر
مشاركة الموضوع :

بقلم الشاعرة/ سلمي رشيد

حبيبي الغايب الحاضر
ف قلبي ف كل وقت وحين
ياريت لو خدت من وقتك
وتحكيلي …ضحكت لمين؟
وليه ف اليوم دا تحديدا
نزلت ب احلي طقم جديد
ومين كان ماشي قدامك
ومين سلم عليك بالايد!!
اكيد كل السلام حاجه
لكني سلامي طبعا غير
طب احكيلي حلمت ب مين
ومين قالك صباح الخير
انا بسأل عشان يعني
اكون مطمنه مثلا
واحس ب اني قدامك
وجنبك مهما طال اليوم
واقوم من النوم ابص عليك
ف اي مرايه قدامي
بشوفك فيا واتنطط من الفرحه
اقوم رايحه و اصلي عشان
يديمك ربنا نعمه
عرفت معاك
بتبقي ملامحي عامله ازاي
ف وقت ما ببقي مكسوفه
واخبي دموعي ب اديا
كإن عينيا مطروفه
وكنت بقولها ليك دايما
انا اصلا معاك مابكيش
ماخلتنيش..
ابين ضعفي قدامك ولو مره
وحتي ان كنت مضطره
بنقلب كل جد هزار
وخدت قرار
اكونلك كل حاجه بجد
تكون فيضان هاكونلك سد
مفيش ف الدنيا دي قبلك
ولا بعدك هايفضل حد
وهفضل كل يوم اسأل
وازن فكل وقت وحين
وتحكيلي فطرت ب ايه
وتحكيلي ضحكت لمين
يا جنه ربنا ليا
ملاك علي شكل بني ادم
بقلب يدق حنيه
بتفرق موت عن التانيين

مشاركة الموضوع :

الشاعره هدى غريب

من السويس حاصلة علي معهد ادارة اعمال تعمل في مجال الصحافةمحرر بجريدة انباء السويس ومحرر في مجلة اشراقة الثقافية .. عضو نقابة العاملين بمجال الشعرعضوية رقم 28 وعضو عامل بجمعية ابداع الثقافية

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *