خط اللهفة

بقلم/ علاء الدين علي

خط اللهفة

*******

كات ف إديكي

فرصة وضاعت

كنت بسطر قلبي العاشق

بين خطين اللهفة ف قلبك

بس عنيكي زي العادة

دايما شايفة بعدسة زوم

وعشان مرة تحني بنظرة

لازم أبعد

أصبح بعد عنيكي وصال

قلت وماله

يمكن شوقها لصوتي ياخدها

يوم وتنادي

فجأءة اتجهت نطرة عينك

يمة قمرة فوق ف العالي

قلت أطلعك

ماهو علشانك ممكن جدا

قمت عملت السلم نبضي

سوره بنيته بصبة شوق

وطلعت أجري بأملي الخايب

بس بضهري

وأما وصلت لآخره وقعت

تهت ساعتها ف ضحكة سنك

قام الفرح يزغزغ قلبي

وانا قال فاكر بيه حسيتي

قلت وسيطة ممكن تنده

ع اللي ف حلم سنيني دا كله

لما تصارحك عن وجداني

ورميت ودني ف حجرك يومها

أسمع إنك حاسة وخايفة

أو خجلانة

فجأة عرفت الجدة الغالية

ليه كات تدعي ويا زعلها

سمعت الرعد

لما اتشكل رد لسانك

زيه تمام

إني خفيف

شرخ سحاب السما جوايا

وأما الحب الساكن جوفي

مات م الصدمة

جاية عشاني

لأ وتقولي

اللي يحب لايمكن يكره

أيوة صحيح

بس محال الميت برضو

يرجع حي

*****

مشاركة الموضوع :

شاهد أيضاً

بالصور صالون تحالف المجتمع المدني الثقافي يناقش مسرحية ما بعد الكارثة للدكتور ايمن الشريف

    كتبت هدى غريب في إطار ايمان صالون تحالف المجتمع المدني الثقافي بضرورة دعم …

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

4 × خمسة =