مانع خروج الصوت

بقلم الشاعر / علاء الدين علي

مانع خروج الصوت

****************

أنا من سكات

ولا فقدت الحنجرة

أو محتمل

صبيت ممر الشفتين

صمغ وخياطة محكمة

طب فين زمان

كان اللسان سكة سفر

من طوله ف محاربة غلط

ممكن ويمكن أو يجوز

كل المجال من كلمتي

جوة المحيط لتردد الصوت

اللي خارج من لسان

نوع م البشر

قاطعين ودانهم من سمع

أو لوح زجاجي مهنته

حجب الكلام إن صوت علي

أو نوعي في التركيب قلب

صوتي لجوفي مرغما

إزعاج لقلب

منبوح ياصوت الحق ليه؟

يا هل ترى

وهم الكآبة اللي إتفشى

من كتر خبط الروس

ف اسمنت الحيطان

كان السبب

ولا نتيجة لمعطيات

حل المعادلة المبهمة

للتركيبات جوة النفوس

أدى ل طرش

****