نفسى أقولك

بقلم..سيد بكر

نفسى أقولك وبثبات
إن قلبى ياغالية مات
مصلوب على بعدك وهجرك
مشنوق بحبل الذكريات
وإتهامى بالأدلة
حيث أن وليس إلا
مقتول وعندى الإثبتات
إنت بعتى عمر عدى
بالمكابرة والمعاندة
بعتى حتى الأمنيات
وإنت عارفه وإنت شايفه
سجنه فى عواطفك وخايفه
وفكره إن الخوف نجاة
والخوف دا سجن كبير
ياروحى
ياللى جرحتى فى جروحى
والقلب غرقتيه أهات
نار بعادك مر صافى
والدوا لو مر شافى
أيوه بأشتاق لك ساعات
والحكم مشمول النفاذ
وليك إنت الإمتياز
ترجعى نبضى ولكن
ولى زمن المعجزات