التنوير – eltanwer ثقافه وفنون
..
يامشعلقه قلبي المكسور
عمرين وكسور
أشواقي م العين السخنه
ولحد الخور
منِك وليكي جواب طاير
وهم وحاير
سكر غلي
على شاى فاير
على وصل النور
إديني حسنه ده انا سيدِك
فرط العنب من عناقيدِك
إديني فرصه أبوس إيدِك
اهدم لِك سور
أعدي على آخر الأحزان
واروي البستان
واكتب على كل الأوزان
ف قصايد نور
رمياني بين بحر وقافيه
وانا بلا قافيه
عايشها بالكاد والعافيه
مستني الدور
خيرِك مبدور
ذنبِك مغفور
مديت إيديا أكبش كبشه
طلعت ناشفه
قلبِك خشبه
وقلبي البنور
واقع على طرف السيراميك
صحيوا المماليك
قفلوا الشبابيك
طار العصفور
أنا قولت أشبط ف جناحه
أعيش فى براحه
أشاركه ليله وأفراحه
شاعر مغمور ..
